17/05/2021 - 11:13 5977

Joriy yilning 14-may kuni MDH sanoat siyosati Kengashining navbatdagi VII yig‘ilishi (keyingi o‘rinlarda Kengash deb yuritiladi) Iqtisodiy taraqqiyot va kambag‘allikni qisqartirish vazirligi raisligida videokonferensiya shaklida bo‘lib o‘tdi.

Ma’lumot uchun: Joriy yilning 8-may kuni O‘zbekiston Respublikasida sanoat sohasida hamkorlik va Mustaqil Davlatlar Hamdo‘stligiga a’zo davlatlarning sanoat siyosati bo‘yicha Kengashini tuzish to‘g‘risidagi Bitim kuchga kirdi.

Hujjat Tomonlarning muvofiqlashtirilgan sanoat siyosatini olib borish uchun sanoat sohasidagi o‘zaro aloqalariga xizmat qiladi; shuningdek, MDHga a’zo davlatlarning sanoat siyosati Kengashi faoliyatining tashkiliy-huquqiy masalalarini tartibga soladi.

Bitimni amalga oshirish uchun, shu jumladan MDHga a’zo davlatlarning sanoat siyosati Kengashi doirasidagi o‘zaro aloqalari uchun mas’ul vakolatli organ O‘zbekiston Respublikasi Iqtisodiy taraqqiyot va kambag‘allikni qisqartirish vazirligi etib tayinlandi.

Ushbu tadbirda Belorusiya Iqtisodiyot va sanoat vazirligi, Qozog‘iston Sanoat va infratuzilmani rivojlantirish vazirligi, Qirg‘iziston Energetika va sanoat vazirligi, Rossiya Sanoat va savdo, energetika va qishloq xo‘jaligi vazirligi, Tojikiston Sanoat va yangi texnologiyalar vazirligi, O‘zbekiston Respublikasi Iqtisodiy taraqqiyot va kambag‘allikni qisqartirish vazirligi vakillari va rahbarlari, shuningdek, D.I. Mendeleyev nomidagi Rossiya Kimyoviy-texnologiya universiteti fanlari bo‘yicha prorektori, va MDH Ijroiya qo‘mitasining iqtisodiy hamkorlik departamenti direktori o'rinbosari ishtirok etishdi.

Yig‘ilishda kun tartibidagi 5 ta loyiha hujjati va axborot-tahliliy materiallarni qamrab olgan 12 ta masala ko‘rib chiqildi va muhokama qilindi hamda tegishli qarorlar qabul qilindi, shu jumladan:

MDHga a’zo davlatlarning kimyo va yoqilg‘i-energetika sohalarini raqamli o‘zgartirish kontseptsiyasi loyihalari va ularni amalga oshirish bo‘yicha ustuvor chora-tadbirlar rejalari;

MDHga a’zo davlatlarning kimyo muhandisligini rivojlantirish bo‘yicha chora-tadbirlar to‘plami loyihasi;

MDHga a’zo davlatlarning fuqarolik kemasozligini rivojlantirish va kema uskunalarini ishlab chiqarishda hamkorligi to‘g‘risida Bitim loyihasi;

Mustaqil Davlatlar Hamdo‘stligida 2030-yilgacha bo‘lgan davrda ishlab chiqarish (sanoat) kooperatsiyasini rivojlantirish to‘g‘risidagi hujjat loyihasini ishlab chiqish va boshqa masalalar ko‘rib chiqildi.

Kengash doirasida Iqtisodiy taraqqiyot va kambag‘allikni qisqartirish vazirligi tomonidan a’zo davlatlar o‘rtasida sanoat kooperatsiyasini rivojlantirishning kontseptual yo‘nalishlari dasturi loyihasi taqdim etildi va muhokama qilindi.

Ma’lumot uchun: 2020-yil 18-dekabrda bo‘lib o'tgan MDH davlatlari rahbarlarining sammitida O‘zbekiston Respublikasi Prezidenti Shavkat Mirziyoyev MDHda sanoat kooperatsiyasi dasturini qabul qilish tashabbusini taklif qilgan edi.

Bundan tashqari, O‘zbekiston tomoni MDHda elektr transport vositalari ishlab chiqarishni rivojlantirish bo‘yicha hamkorlikka tayyorligini e’lon qildi.

Uchrashuv yakunida yig‘ilish ishtirokchilari 12 ta qarorni imzoladilar, Kengashning navbatdagi yig‘ilishini 2022-yilda O‘zbekiston Respublikasida o‘tkazish, shuningdek, sanoat sohasida, shu jumladan, ushbu Kengash doirasida o‘zaro aloqalarni davom ettirish to‘g‘risida kelishuvga erishildi.

Iqtisodiy taraqqiyot va kambag‘allikni qisqartirish vazirligi

Axborot xizmati